निपेन कुमार माहातअ चिलबिंधा
My Mati: कटा गाउं माहान दुइ बुढा - बुढि रहत, दुइअ बुढा-बुढि कर छउआ पुता निरथिन. छउआ पुता ना रहेएक कारने अखरा गाउं ले बाहराइ के एकटा अखंड बने घार बनाला आर घार टा हिंदे ले हुंदेले काट जड़अ करिके चाइरअ धारे कुंटा गाड़ि-गुड़ा के एकटा खुब सुंदर माटिकर घार बनाल आर छाइन टाञ खापरा मापरा छारि-छुरा जुइत-जाइत करि के एकटा घार बनाइ के तेइआर करला. उ घार टाहिं रहे लागला. आर अखअर ठिन दुइ टा सुंदर-सुंदर गरु रथिन बड़अ-बड़अ भगअल धड़अ सकतअ रेंगिआ रंग कर रहत भगल गिला. आर दुइअ बुढा-बुढाञ आपन छउआ निआर मानेइ हेलथिन गरु गिला के. सेइ उ समइ टा आसाड़ मासेकर दिन रहेइक पानि दमे करेइ हेलेइक बने तअ हामअर कनअ कर डर नि खालि ‘टिपक बिर’ (बेइरसा पानि) केइ डर चुलहा धारे भात खाइ-खाइ एसअन गदरतला हामअर आरअ कनअ कर डर नि ख़ालि टिपक बिर के डर. एसअन कहिके दुइअ बुढा-बुढि निदाला.
सेइ हेनअ संजग एकटा चअर गेले आहे गरु गिला चराइ के घार लेगबेइन कहिके आर एकटा बाघ गेले आहे गरु गिला खाबेइ कहिके. सेइ टिपक बिर आउला काथा टा चअरे आघुइ सुनल रहे चअरे केहेइस चल बेटा एबार तअ मअरे हेला गरु गिला घार लेगबेइन संधडि-सुंधडा आर बाघे कहेइस आइज तअ मञ बनेक राजा. आइज हलउ पेट भरि के खाइ पाउम मांस कहि के ढुकलाक बुढा-बुढि रखअर घार आर हुंदे चरअ ढुकले आहे गरु चराबेइन कहिके. ठिक उ समइ टाञ अखअर पुरा घुम हेइ गेले रहेइक. तअ भाइ चअरे गरु टाइ हेके कहिके एके बारे बाघ केइ धरले आहेइक धड़अ सकतअ आहे कहिके गंदराइ साहे चअर. चअरे गरु टाइ हेके कहिके भरइए सकतअ बांधि-बुंधा के आनेहेइक-आनेहेइक, तअ ठिक भिनसार-भिनसार बिहाने भउर-भउर हेइकला तअ देखेइकला साला दअमे बड़अ बाघ.
चअर तअ बाघ के देखि के एकटा लेदा पलास गाछ उठि गेलाक आर बाघ कउ उपर दिगे टानेइकला सेइ खअने चअर तअ फेथ लेनता एकटा आइड़ कर पेंदा माहान गिरउक आर बाघ तअ भाइ फुचकि गेलाक. तखअन बाघ दअमे पाड़ाल आहे टिपक बिर रे-टिपक बिर रे कहिके. सेइ खअने तअ चअर गाछ ले गिरले आहे आइड़ पेंदाञ चअर दुखा कअर बेथाञ सुइट-सुइट करेइ साहे. बाघ तअ दअमें पाडाल आहे, हेनअ संजग एकटा सिआरे बाघ के देखेइकला बाघ के कहेइकला काहां रे भाइ एतिक पाडाल आहिस, हुंदे तअ कहबे मञ बनेक राजा हेकअं. तअर किना एसअन दुख हेलउ कहि दे तअ, जदि पारम हले. उटा कअर समाधान करल जातेइक एसअन कहि के सिआरे आपन काथा टाके राखलेइक. सेइ खअने बाघे हेंपसा-हेंपसि करिके
बाघे सिआर के कहेइकला किना कहि देबअं दादा : मअके नअ एकटा "टिपक बिरे" रगदाल आहे कहिके बाघे सिआर के कहिदेइकला. सिआरे बाघ के कहेइकला आरे बुड़बग टिपक बिर के डरासिकला चअ नअ देखाइदेबे केसअन एसअन टिपक बिर हेके मर लउ चालाक टिपक बिर हेके एसअन कहिके सिआरे बाघ के कहेइकला. चअर तअ टुकु खनेक बादे चेठा हेलाक सिआर तअ चेलि गेलाक चअर टाके देखिके तअकते बाघ तअ आर जाइ नि डरे बाघे सिआर के कहेइकला भाइधा मञ तअ आर नि जाम बहुत कसटञ मरल लक टा बांचि के आले आहं तहिं जाबे जा. सेइ खअने सिआरे बाघ के कहेइकला हं तअबे ठिक आहेइक मञ एकबार जाइ के देखअला. केसअन एसअन टिपक बिर हेके, सिआर चलि गेलाक आर सुंघि-सुंघा देखेइकला मुड़े काने पेसाप करि कुरा देहेइक चअर खअने तअ रागाइ लागलाक.
चअरे रअसे-रअसे करि के धरउक सिआर कर पुंछ आर घुराइ कुचा-घुराइ कुचा करि के सिआरेक पुंछ तअ भाइ फुचकअलेक. तखअन सिआरअ दअमें पाडाल आहे घुरन टिबिर रे घुरन टिबिर रे कहिके सिआर आर बाघ दअमें पाडाल आहात. सेइ खअने एकटा हनु आंजिर गाछ कअर उपरे रहे हनुञ सिआर आर बाघ के देखि के कहेइनला किना हेलउन दादा रा,किना हेलउन दादा रा दअमें पाडाल आहिआ जे पाछे बअने कनअ घटना घटल आहेइक नअ किना कहिके हनुञ आपन बात टाके राखलेइक. बाघे आर सिआरे आपन बेथा दुख-कसटअ गिला के कहिदेलथिक नि रे भाइ हामअर नअ ऐसने-ऐसने हेले आहेइक कहि के कहि देथिकला. सेइ खअने हनुञ रागाइ कहेइनला चाला नअ केसअन ऐसअन ‘टिपक बिर’ हेके आर केसअन ‘घुरन टिबिर’ हेके महुं एकबार देखिए लेबेञ कहिके हनु तेइआर हेइ गेलाक.
साला के थापडाइ देले जदि फिर-फिर नि देगताक तअ मरअ नाम मिछा कहिके आउए लागल. डरे तअ सिआर आर बाघ पास नि जात अरा दअमें धुरेइ आहात. हनु चअलि गेल देखेइकला काहुं लक नाइ, चअर तअ चेएठा हेइ गेले आहे चअर लाजे सरअमें घार जाएक दिगउ नि हेइसाहे कनअ धारे नि हेइसाहे. सेइ खअने चअर एकटा बड़अ ‘ठिला उडुं’ धुकल आहे. हनुञ बाघ के आर सिआर के दअमें धमकाइनला कइ रे मरद रा काहां टिपक बिर आहे नअ काहां घुरनटिबिर आहे देखाउ कहि के दअमे गुइल कअरे लागलाक. तअ सेइ हनु जन ठिन बसअल रहे सेइ ठिन टाइ एकटा बड़अ ठिला रहेइक आर हनुञ ठिला टाके लेथिआइ देलेइक पाछे हिंआ लुकाल आहे नअ किना कहिके. हनुक पुंछ तअ लांबा रहेइकला हनुञ अकर पुंछ टाके ठिला उडुञ ढुकाइ के सुड़बुड़-सुड़बुड़ करेइसाहे.
चअरे किना करउक दाबाइ हेइ बनि लेल जुइत हेइ लेलाक आर एकेबारे हनुक पुंछ चअरे मरअ कटअ धरि लेलाक आर पुंछ के टाने लागले आहेइक. चअरे हेठ देगे टानेइकला आर हुनञ उपर दिगे टानेइकला, दुइअ लक दअमें टाना टानि हेतला. एहें निआर टाना टानि करेइत करेइत तअ हनुक पुंछ उपडि गेलेइक. हनुअ दअमें पाडाल आहे उपडन टिबिर रे-उपड़न टिबिर रे कहिके बन दिगे दचअक पाडाल आहे. सेइ अखरा तिनअ लक बाघ, सिआर आर हनु जड़अ सड़अ हेला आर एकटा ‘धंधउरा’ माहान गपचि बनि के गलफअ गिला के सुरु करि देलथिक. इटा तअ भाइ हामर लउ बड़अ ‘सेर’ हेके कहिके एखरा आपन-आपन बात गिला आघु बाटे बाढाइ लागला. सेइ किछु खअनेक बादे चअर टा धिरे-धिरे ठिला उडुं ले बाहरालाक आर लाजे-सरमे हेइके चअरे घार दिगे जाएकअर आपअन रासता नापे लागल.
(छात्र, बीए, सेमेस्टर-5, कुड़मालि विभाग, पीपीके कॉलेज बुंडू, रांची)
